Čudne neke suvenire ja donosim sa putovanja.
Dok većina ljudi kupuje razne krpice i parfeme , ili magnete i staklene kugle, ja dovlačim nove namirnice i začine. I uvijek moji koferi čudno mirišu, na daleke destinacije i neistražene kuhinje…
Prije par mjeseci bila sam u Švedskoj i u libanonskom restoranu probala kus-kus. Napokon. I oborio me je s nogu. Iz restorana sam otišla pravo u market i kupila 2 kg kus-kusa, eto da se nađe, i vukla ga preko pola Evrope, oduševljena novitetom koji donosim.
Odavno sam čula za njega, ali ga nisam imala priliku ni probati ni kupiti. A kad sam stigla kući iznenadih se jer u lokalnom market nađoh kus-kus, i tako se još jedna namirnica odomaći u našoj kuhinji…
Prvo sam ga spremala kao prilog. Poprilično je jednostavnog i blagog ukusa, ali odlično upija začine i lako mu je dati željenu aromu, a sprema se veoma brzo pa je na dobrom putu da nam postan omiljeni prilog.
A kad sam spremila kus-kus sa povrćem, e to je bio vrhunac, malo smo ga jeli za ručak, kao prilog uz natur šnicle, a onda za večeru navalili na kus-kus kao laganu povrtnu salatu… e o toj salati gotovoj za 15-20 min ću danas da vam pišem…
- 100 g kus-kusa
- 4 dcl vode
- 1 povrtna kocka za supu
- 1 crvena paprika
- 1 zelena paprika
- 1 mala tikvica
- 1 manji praziluk
- 2 šargarepe
- 1 češanj bijelog luka
- So, biber
- Korijander u prahu
Prokuvati kocku u vodi i po potrebi posoliti i pobiberiti. Vrelim preliti kuskus, promiješati i poklopiti pa ostaviti da nabubri 5-7 min. Kus-kus pije mnogo tečnosti, i otprilike je potrebno 3-4 puta više tečnosti nego kus-kusa. Najboje je koristiti omjer preporučen na pakovanju.
Ako je ostalo tečnosti, procijediti, a zatim kus-kus rastresti viljuškom i ostaviti da se hladi.
Dok čekate da kus-kus nabubri, pripremite povrće. Moja kombinacija je bila, paprika u dvije boje, praziluk, tikvica i šargarepa, a vi možete izbor povrća prilagoditi sezoni i omiljenim ukusima.
Povrće očistiti i izrezati u trakice. Na maslinovom ulju kratko propržiti, stavljajući redom od tvrđih ka mekšim namirnicama. Kod mene je to bilo, šargarepa, praziluk, paprika i na kraju tikvica, kako sam šta sjekala tako sam dodavala u tiganj. Na kraju dodati i sitno sjeckani bijeli luk, posoliti i pobiberiti i dodati korijander u prahu…
Pržiti 2-3 minuta na jakoj vatri uz stalno miješanje, a povrće treba da ostane krckavo i jedro.
Na kraju dodati nabubreli kus-kus, promješati i ostaviti da se prohladi.
Možete ovako pripremljen kus-kus servirati kao prilog, ali i kao salatu što se nama mnogo više dopalo.
Uskoro će povrće, i zavladaće šarenilo na pijacama, a mi ćemo željeti provesti svaki slobodni trenutak u šetnji i prirodi. Za takve dane kus-kus je pravi izbor, salatica koja se brzo sprema, a uz lagane šnicle ili samo uz sir kus-kus sa povrćem je puni obrok…
Preporučujemo:
Kus-kus sa grilovanim povrćem |
Riža sa povrćem |
Desina boranija |
Juneće šnicle u gulašu |
