Ajvar od pečenih paprika

Ajvar od pečenih paprikaDa li i kod vas jesen miriše na pečene paprike?

Slatkasti miris blago nagorjelih paprika kod nas već neko vrijeme leluja gradom, a ples vrelog vazduha i dima ukazuje na izvor ovog jesenjeg zadovoljstva.

Od pečenih paprika trista čudesa može se spremiti, ali najljepše čudo od svih je ajvar. Pravi starinski prženi ajvar od čistih paprika, na plotni pečenih…

A ajvar je posao! Tri dana da se njime baviš, pa opet da ti nije žao 🙂

No iako je posao veliki, nećete se pokajati, pa zato krenimo sa pričom, od odlaganja i prevelikog ćakulanja se neće sam spremiti…

  • 10 kg crvene (roga) paprike
  • 300 ml ulja
  • Soli po ukusu (3-4 kašičice)
  • Glavica bijelog luka
  • Feferone po ukusu

Dan prvi je trgovina i pečenje paprika. Ove godine mene je tata obradovao pozivom sa kvantaške pijece : Mali, ima sjajnih paprika. Da ti ja ispečem jednu turu?

Ima li ko tatu kao ja?Penzioner beskonačne energije i ljubavi. Takav vam je divni moj tata.

Pečene paprike ostaviti poklopljene par sati da se potpare. Ako spremate manju količinu (10-15 kg) možete stići u jednom danu i ispeći i oguliti paprike. Ako se odlučite za veću količinu, onda je to ipak posao ili do kasno u noć ili za dva dana. A da vam pečenje lakše padne, možete ga začiniti na kraju roštiljom pa da ipak uživate u čarima boravka pored vatre.

Ajvar od pečenih paprika

Dan drugi je guljenje paprika. Najdosadniji i najpipaviji dio pravljenja ajvara. Svo ono čudo paprika koje ste ispekli sad treba oguliti i očistiti od sjemenki. Da vam krsta otpadnu. A onda slijedi cijeđenje. Za ovo je najbolje koristiti vreće za krompir (naravno, čiste). Napuniti ih očišćenim paprikama i okačiti ih da se cijede. Mi uvijek vreću zavežemo oko tuš-baterije i ostavimo je da se kapa u kadu preko noći. Treba njima barem 12 h cijeđenja, jer što se bolje okapaju lakše će se i brže kasnije upržiti.

Ovdje vas čeka veliko spremanje kuhinje, pranje krupnog suđa i čišćenje ostataka kožica i sjemenki. Ali opet ponavljam, vrijedi. Ne odustajte.

Dan treći počinje pranjem tegli. Koliko će vam tegli trebati? Manje no što ste se nadali. Uglavnom računajte da ćete dobiti 50% ajvara od ukupne količine paprika znači od 10 kg paprika izađe oko 5 tegli. Ovo je proizvoljno jer zavisi od kvaliteta paprika, koliko su debele i mesnate i koliko su pune vode. Zavisi i kasnije koliko upržite ajvar. Najbolje je da, ako ste u prilici, birate zdrave ali blago dehidrirane (smežurane) paprike, jer su one već izgubile dio tečnosti.

Nakon tegli slijedi mljevenje paprika. Ja ih meljem na mlinu za meso. Mi volimo da su krupno mljevene, a vi svom ukusu prilagodite mljevenje. U veću šerpu sipajte ulje. Veću , ustvari mislim širu. Dodajte mljevene paprike i pržite na srednje jakoj vatri. Dodajte 1-2 kašičice soli da ubrzate proces otpuštanja tečnosti iz paprika. Ipak ne pretjerujte jer će tokom prženja paprike izgubiti na količini pa će i biti slanije. Slanost dotjerajte na kraju.

Dok se ajvar prži očistite i sitno isjeckajte bijeli luk, a ako volite ljuti ajvar dodajte i sitno sjeckane feferone.

Ajvar od pečenih paprika

Sad vam predstoji par sati stajanja uz šporet, miješanja i paženja da ajvar ne zagori. A ako malčice i zagori, nije strašno, no ipka ne pretjerujte. Ako vam se čini da previše zagara ipak povećajte količinu ulja. Ajvar će brzo nakon započetog prženja da se zgusne, pa će onda da se razrijedi odnosno da paprike puste višak tečnosti, pa će tek onda da se lagano upržava i zgušnjava. Koliko vremena treba, zavisi od količine paprika i veličine šerpe. Plića a šira šerpa ubrzaće vam ovu priču.

Kad počnete sa 10 kg paprika, dobićete oko 6 kg mljevenih paprika, a nakon prženja će ta mjera biti oko 5 kg. Ova količina stane u najveću šerpu iz standardnog kuhinjskog seta i treba joj oko 2 sata prženja na srednjoj temperaturi (5 od 9 podioka).

Ajvar je pečen kad ispari veći dio tečnosti, gustine je malo rjeđe nego što bi ajvar trebao biti i kad povučete varjačom po dnu šerpe, ostaje trag i ajvar se polako za varjačom spaja. Sklonite ga tad sa ploče pa po potrebi dodajte soli. Iz par navrata ga dobro izmješajte i ajvar je spreman za tegle.

Oprane tegle pred kraj prženja ajvara stavite u rernu i ugrijte 30 minuta na 100C. Tople tegle punite vrelim ajvarom i dobro ih zatvorite. Ja u ajvar ne dodajem ni konzervans ni sirće, već dodatno pasterizujem tegle i onda ajvar može da stoji godinama. Naravno, pod uslovom da je daleko od očiju 🙂

Dno velike šerpe pokrijte krpom složite tegle pa nalijte vode do ispod poklopaca tegli i stavite da provri. Isključite kolo i ostavite tegle da prenoće i lagano se hlade zajedno sa vodom u kojoj su pasterizovane. Ako ste se odlučili za spremanje veće količine, biće i više tegli, pa ih ili pasterizujte u više šerpi ili u više tura pri čemu pasterizovane i još vrele tegle prebacujte u banjicu sa vrelom vodom da se polago hlade.

Ajvar od pečenih paprikaJoš dok se prži ajvar možete oprati višak suđa i očistiti kuhinju, pa je ostalo za četvrti dan samo da teglice (mile nam i drage) složite u špaiz, a zadnju obavezno da otvorite već za doručak, i da s prvima zalogajem iako umorni zaključite da se trud isplatio.

A kad se već zabavljate sa pečenjem paprika i pravljenjem ajvara, možete i nešto paprika ispeći za zamrzavanje, od kojih kasnije nastaju mnoge čarolije (Salata, Macanica, Pohovane…) a mogli bi i koju teglu ukiseliti… o kiselim pečenim paprikama, pišem vam uskoro…

Sad ću da vas prvo pustim da malo odmorite od trodnevne pripreme ajvara i da bez ometanja uživate u tom neprikosnovenom kulinarskom biseru Balkana…

Preporučujemo:

Urnebes salata
Urnebes salata
Ukiseljena šargarepa
Ukiseljena šargarepa
Kiseli krastavci
Kiseli krastavci
Pečene crvene paprike
Pečene crvene paprike

5 thoughts on “Ajvar od pečenih paprika

Leave a Reply

Your email address will not be published. Required fields are marked *