Patišpanj | Kuvaj za me

Patišpanj je starinski crnogorski kolač. Nastao je pad uticajem zapadanih kultura, kao domaća verzija spužvastog kolača ’Pan di Spanga’, a ime mu je tek malčice modifikovano. Jednostavan, sa minimumom sastojaka odgovarao je siromašnoj crnogorskoj kuhinji, pa je sa zadovoljstvom prihvaćen i godinama pripreman kao da je baš iz crnogorskog krša potekao.

Patišpanj je lagano vazdušasto tijesto spremljno najvećim dijelo, od jaja. A kad se sprema od pravih domaćih jaja, na selu gdje koke šetaju slobodno i zoblju travu sjemenke i crviće, a ne kljukaju se koncentratom, jaja su više narandžasta nego žuta ,pa je i sasvim jednostavan patišpanj prava poslastica.

6 jaja (480 kcal)

6 kašika šećera (360 kcal)
7 kašika brašna (245 kcal)
2 vanil šećera (80 kcal)
1 prašak za pecivo
Prstohvat soli
30 g putera i kašika brašna za pripremu pleha (227 kcal + 35 kcal)

Ukupno: 1427 kcal

Jaja ostaviti par sati da odmaraju na sobnoj temperaturi. Razdvojiti žumanca i bjelanca, a bjelanca umutiti sa malo soli. Umućena bjelanca formiraju čvrsti snijeg koji stoji čvrsto čak i kad okrenete zdjelu naopačke. Najbolje ih je mutiti u metalnoj ili staklenoj zdjeli koja mora biti savršeno čista i suva. Bjelanca treba mutiti srednjom brzinom u istom smjeru, i za svega par minuta će se lagano formirati čvrsta pjena zvana šam.

U drugoj zdjeli treba zatim umutiti žumanca sa šećerom i vanil šećerom. Mutiti ih oko 5 minuta da posvijetle i da se šećer rastopi i prestane krckati. Krajnji rezultat je lagana pjenasta masa.U umućena žumanca tada dodajemo brašno i prašak za pecivo, i dobro ih umutimo srednjom brzinom miksera. Dobijena masa je prilično gusta i čvrsta.

I na kraju u umućena žumanca dodamo 1-2 kašike pripremljenih bjelanaca i mutimo najmanjom brzinom miksera kako bi razrijedili čvrtu masu. Ostatak bjelanaca dodajemo u dvije –tri ture i mutimo sve ili najmanjom brzinom miksera ili žicom za tijesto. Bitno je da se bjelanca i žumanca lagano sjedinjuju i da konačna masa ostane pjenasta i vazdušasta. Brzo i intenzivno mućenje može izazvati padanje tijesta.

U puterom podmazan i pobrašnjan pleh polako izlijemo pripremljenu smjesu , sačekamo 15-20 sec da se ravnomjerno rasporedi pa pečemo na 180C oko 30 min.

Patišpanj će lijepo porasti i još ljepše zamirisati. Pečen patišpanj se lagano počinje odvajati od bočnih rubova tepsije a vi za svaki slučaj čačkalicom provjerite da li je pečen i u sredini.

Izvađeni patišpanj izvrnite na čist tanjir dnom okrenutim na gore i ostavite ga da se hladi. Ohlađen i spreman za posluženje ponovo izvrnite kako bi prava strana bila na vrhu. Ovaj mali trik će vam pomoći da patišpanj izgleda lijepo i ravno i da se ne primjeti da je tokom hlađenja splasnuo.

Na kraju, mnogi kao moj maleni sestrić obožavaju patišpanj i stavljaju ga ispred drugih slastica. Često se služi sam, a u posebnim prilikama kad se ima i može ili kad se gostu želi ukazati posebna čast uz patišpanj se serviraju svježe voće, domaći džem ili slatko.

Jednostavan i nježan, iskren i prijateljski topal, patišpanj je kolač koji u Crnoj Gori često i sa radošću spremamo i djelimo sa dragim prijateljima.